Suraxanı sakini Aynur Nuriyevanın "Kanal14"ün canlı yayımında danışdıqlarını dinlədikcə adama elə gəlir ki, dedektiv Hollivud filmi izləyir.

"DogruXeber.az" xatırladır ki, ötən yazımızda Suraxanı rayonu, Suraxanı qəsəbəsi 14 iyul küçəsində yaşayan Aynur Nuriyevanın redaksiyamıza müraciəti və iddiaları barəsində məlumatları dərc etmiş, həmçinin aidiyyatı qurumlara rəsmi sorğular göndərmişdik.

Əvvəla onu diqqətinizə çatdırmaq istəyirik ki, göndərdiyimiz rəsmi sorğuları bir neçə gün keçməsinə baxmayaraq nə Əmlak Məsələləri Dövlət Xidməti, nə Şəhərsalma və Arxitektura Komitəsi, nə də namıdəyər Suraxanı Rayon İcra Hakimiyyəti hələ də cavablandırmayıb.

Atalar məsəlidir: "Susmaq razılıq əlamətidir".

Aidiyyatı qurumların susqunluğu xanımın haqlı olduğunu və bu haqlı iddialara onların verəcək cavablarının olmadığı anlamına gəlir. Lakin, Aynur Nuriyevanın iddiasına görə ona qarşı təzyiqlər, bununla yanaşı xahiş-minnətlər davam edir. Onun redaksiyamıza təqdim etdiyi növbəti videogörüntülərdə özünü icra hakimiyyətinin işçisi kimi təqdim edən Elməddin adlı şəxs dövlətin binasında (yəni vəzifə başında) başında "kepka" papaq, əynində sport gödəkcə, əli cibində xanımın qarşısında dayanıb, onu Allahdan qorxmağa dəvət edir. Görünür xanımın onu lentə aldığından xəbərdardır, lakin özünü bilmirmiş kimi apararaq, israrla, "Allahdan qorx, mən səndən pul istəməmişəm, hədə-qorxu gəlməmişəm" deyərək, xanımı yalançı çıxarmağa çalışır, digər tərəfdən isə, başqa bir şəxsin Aynur Nuriyevanın yaşadığı həyətin darvazasını möhkəm döyəclədiyi, evdə heç kimin olmadığını anladığında isə telefonu yuxarı qaldırıb, həyəti videoya çəkdiyi müşahidə kamerasına düşüb.

Xanımın sözlərinə görə, həmin gün o, evdə olmadığı üçün gələnin kim olduğundan xəbərsiz olub. Qonşusu ona bildirib ki, - "Əmlakdan gəlmişdilər, sən evdə yox idin". Yalnız bundan sonra, gələnin Əmlak Məsələləri Dövlət Xidmətinin əməkdaşı olduğu məlum olub.



Bu nə rəzalət, hörmətli Mətin müəllim?

Bəlkə belə bir hüququnuz var, biz bilmirik?

Sizin işçiniz hansı əsasla vətəndaşın xəbəri və razılığı olmadan onun şəxsi həyətini lentə alır?

Bundan əlavə, Suraxanı rayon icra hakimiyyətinin, "bizim elə işçimiz yoxdur", icra nümayəndəliyinin isə, "necə yəni yoxdur, işçi deyilsə burda niyə oturub" dediyi Elməddin adlı şəxs (deyilənə görə maklerlərdir) nümayəndəliyin sözünə qüvvət, hansı səbəblə icra nümayəndəliyinin inzibati binasında əyləşir, üstəlik torpaq almaq, tikinti aparmaq və sair işlər görmək istəyən vətəndaşlarla "bazar açıb, qiymət oxuyur"?

Qeyd edək ki, Aynur Nuriyevanın redaksiyamıza göndərdiyi daha bir videogörüntüdə bir qrup şəxsin yenidən onun evinə gəldiyi aydınca görünür. Kameraya düşməmək üçün həyətə girməkdən imtina edən şəxslər, xanımın sözlərinə görə həyətində aparmaq istədiyi tikinti yerinə baxış keçiriblər və xanıma Şəhərsalma və Arxitektura Komitəsindən icazə almasının mütləq olduğunu, oranın icazəsi olmadan tikinti apararsa birmənalı olaraq həmin tikintinin söküləcəyini bildiriblər.

Halbuki ki, biz özümüz də Suraxanı qəsəbəsində çəkiliş apardığımız zaman da şahidi olduq ki, 14 iyul küçəsində hətta kənd təsərrüfatı təyinatlı ərazilərdə belə çoxsaylı tikililər mövcuddur.



Yeri gəlmişkən, hər kəsə məlumdur ki, Aynur Nuriyeva Suraxanı rayon icra hakimiyyətinin təptəzə başçısı Adil Əliyevdən narazı olan yeganə sakin deyil. Xatırlayırsınızsa, bir müddət əvvəl Suraxanı Rayon Hövsan qəsəbəsi, Elman Qasımov döngə 2 ünvanında yaşayan şəhid ailəsi Şahmurov İlqar Əlihəsən oğlu da mediaya müraciətində rayon icra hakimiyyətinin onun tikintisini sökdürdüyünü, hətta onun cibinin pulu ilə aldığı tikinti daşlarının icra hakimiyyətinin apardığı abadlıq işlərinə sərf olunduğunu bildirirdi. Və o, da bu durumdan şikayətçi olduğu üçün təhdidlərə məruz qaldığını deyirdi.

Əslində bu kimi iddialar, Adil Əliyevin keçmişi barəsində yerli mediada yazılanlarla üst-üstə düşür.

Sosial media və sosial şəbəkələrdə "qoçu dəstəsi" ilə tez-tez gündəmə gələn idmançı məmur barəsində "xalqxeber.az" saytı yazır

"Başına yığdığı idmançılardan ibarət qoçu dəstəsi ilə o, dövrlər şəhərdə terror əsdirən Adil Əliyevin dəfələrlə kriminal “razborkaların” iştirakçısı olduğu həmin vaxtları yaxşı xatırlayanlara məlumdur. Əsasən şəhərin mərkəzi rayonlarında öz kriminal fəaliyyətini davam edən Əliyev neft oğurluğu ilə məşğul olub. Sonralar Adil Əliyev “dəstəsi” ilə yeni formalaşmaqda olan orta biznesin üzərinə çökür. Bakının bağ massivlərindən birində “özəl həbsxana” təşkil edən Adil Əliyevin xərac üstündə onlarla biznesmeni və iş adamını bu “özəl həbsxanasında” döyərək işgəncə verdiyi, polisdəki əlaqələri, habelə qardaşının adından istifadə edərək bütün işləri bağladığı da çoxlarına məlumdur."

Oxuduqca adamın dəhşətdən tüklərini qabardan bu məlumatlarla Suraxanı sakinlərinin iddialarının biri-birini tamamlaması da artıq təəccüblü görünmür.

Bu boyda həngamədən sonra Adil Əliyev özünə yaxın bloggerləri də başına yığıb, şəhid uşaqları üçün əyləncə təşkil edir, sonra da bunu işinin yalnız onu tərifləməkdən ibarət olan sosial şəbəkələrdə yayımladır. Yəqin, bununla da "gözlərdən pərdə asdığını" düşünür.

Lakin, hörmətli, Adil müəllim, sizin indi istifadə etdiyiniz pərdəni artıq beşinci ildir (44 günlük müharibədən sonra) ki, demək olar bütün məmurlar o, qədər işlədib ki, tamamən "üzülüb əldən çıxıb", artıq el demişkən, "bəri üzündən baxanda, o, üzündə Ərdəbil görünür".

Əslində, keçmişi ört-basdır etmək üçün əlinizdə çox böyük şansınız - vəzifə səlahiyyətləriniz var. Səlahiyyətlərinizi çıxışlarınızda vurğuladığınız o, vicdan və dürüstlüklə icra etmək kifayət edər ki, həm ölkə başçısının sizə olan etimadını doğruldasınız, həm də rayon sakinlərinin etibarını, rəğbətini qazanasınız.

Xüsusi vurğulamaq yerinə düşər ki, bizim Adil Əliyev də daxil olmaqla, heç bir məmurla şəxsi qərəzimiz yoxdur. Ucaltdığımız səslər, hüquqları tapdanmış vətəndaşların hıçqırıqları, haqq səsləridir.

Bəlkə də əmri altında çalışan insanların, rəhbərdən xəbərsiz "meydan sulama" ehtimallarını da düşünərək, həmin rəhbərlərin diqqətinə çatdırmağı özümüzə borc bilirik, işin qalanı rəhbərin üzərinə düşür.

Odur ki, Adil Əliyevin verdiyimiz məlumatlardan nəticə çıxaracağı, icra hakimiyyəti və bələdiyyə tərəfindən hüququ pozulmuş sakinlər üçün lazım olan addımları atacağı ümidilə mövzunu davam etdirəcəyik.

Redaksiamız hər kəsin söz haqqını tanıyır.

DogruXeber.az