Ermənistan rəhbərliyi ATƏT-in Minsk qrupunun ləğvi ilə bağlı Azərbaycanın tələblərini yerinə yetirmək üçün fəal addımlar atır.
Teleqraf xəbər verir ki, bu barədə “Past” qəzeti yazır.
Erməni nəşri xatırladır ki, bir neçə gün əvvəl Baş nazir Nikol Paşinyan Minsk qrupunun buraxılmasının əleyhinə olmadığını açıqlayıb:
“Bundan sonra xarici işlər naziri Ararat Mirzoyan da parlamentdə Minsk qrupunun buraxılmasının lehinə çıxış edib.
Dünən ATƏT-in türk baş katibi Feridun Sinirlioğlu Paşinyan və Mirzoyanla görüşmək üçün İrəvanda olub. Ermənistan Xarici İşlər Nazirliyi türk diplomatın səfəri ilə bağlı kifayət qədər geniş bəyanat verib, burada Minsk qrupuna da istinadlar var. Xüsusilə qeyd olunur ki, Ararat Mirzoyan Ermənistanın ATƏT-in Minsk qrupu ilə bağlı səsləndirdiyi yanaşmaya toxunub, sülh prosesinin digər komponentləri ilə əlaqədar Ermənistan tərəfinin irəli sürdüyü təklifləri təqdim edib.
İndi bu baxımdan vəziyyət Türkiyə və Azərbaycan, eləcə də Ermənistan hakimiyyəti üçün əlverişlidir. Hesab etmək olar ki, artıq Minsk qrupunun buraxılmasının əsası qoyulub”.
