“Serial və ya filmə çəkilməyə vaxtım yoxdur”.

Bu sözləri Xalq artisti Firəngiz Mütəllimova “Cebheinfo.az”-a açıqlamasında deyib. O, hazırda çox məşğul olduğunu bildirib:

“Serial və filmlərlə bağlı təkliflər gəlir. Lakin hazırda həm serial və ya filmə çəkilməyə vaxtım yoxdur, həm də hələ istəmirəm. Əlbəttə ki, xoşuma gələn layihə olsa, qəbul edərəm. İndi işim əsasən teatrdadır. Ən son benefisim olan “Varlı qadın” tamaşasını təhvil verdim.

Bu tamaşa Azərbaycan Dövlət Akademik Milli Dram Teatrında 45 il səhnədə olmağım münasibətilə hazırlandı. 18-19 aprel tarixlərində təmtəraqlı anşlaq oldu. Həmçinin, məşqlərə, dövlət tədbirlərinə və teatrda çıxışlara gedirəm. Mən teatrda Bədii Şuranın da üzvü olduğum üçün tamaşalarımıza baxıram. Yəni işim çoxdur. Bu səbəbdən də serial və filmlərə çəkilmirəm. Həm də bəzi şeylər xoşuma gəlmir”.

Sənətçi müasir kommersiya filmlərininin keyfiyyətinin aşağı olmasından da danışıb:

“Sovet dövründə çəkilən filmlərimiz daha keyfiyyətli və yaddaqalan olurdu. Onlar indiyə qədər izlənilir. Həmin filmlərlə indi çəkilən kommersiya filmlərimiz arasında yerlə göy qədər fərq var. O vaxt aktyor heyəti daha düzgün seçilirdi. Aktyor bir filmə çəkilmək üçün bir neçə kastinqdən keçirdi və onların hər biri Moskvada təsdiq olunurdu. İndi isə belə prosedurlar yoxdur.

Məsələn, bəzən seriala baxanda orada çəkilənləri tanımıram. Bəzən də eyni aktyorların fərqli seriallarda çəkildiyini görürəm. Dünyanın heç bir yerində belə şey yoxdur. Lakin az sayda da olsa yüksək səviyyəli filmlərimiz də çəkilir. Son olaraq “Tağıyev: Neft” filmini izlədim və çox xoşuma gəldi”.

Firəngiz Mütəllimova bir çox istedadlı tələbə yetişdirdiyinə də diqqətə çatdırıb:

“Mənim istedadlı tələbələrim çoxdur. Onların bir çoxu artıq populyardır. Məsələn, rejissor İmran Qurban, “Planet Parni iz Baku”nun aktrisası Nigar Babayeva, “Yuğ” teatrının aparıcı aktrisası Ləman Merihi qeyd edə bilərəm. Siyahını daha da uzatmaq mümkündür. Yəni tələbələrimin əksəriyyətinə bu gün filmlərdə, seriallarda və ya tamaşalarda rast gəlirəm”.

Xalq artisti son zamanlar teatra marağın artdığını da vurğulayıb:

“Teatrın indiki vəziyyəti çox əladır. Koronavirus pandemiyasından sonra teatra axın başlayıb. Sadəcə təsadüf nəticəsindəzallar ayda 1-2 dəfə yarıya qədər dolur. Adətən zallar dolu olur. Yəni son zamanlar insanların teatra marağı artıb. Hazırda hər şey çox gözəldir”.