“Ermənistanda indiyədək konstitusiyaya dəyişiklik üzrə keçirilən referendumların heç biri xalqın iradəsini əks etdirməyib”. Bunu Ermənistanın Baş naziri Nikol Paşinyan deyib. Paşinyan bildirib ki, Ermənistan cəmiyyəti ilə qanunçuluq arasındakı uçurum məhz bununla əlaqədardır.
Milli Məclisin deputatı Vüqar İskəndərov Bizimyol.info xəbər portalına açıqlamasında bildirib ki, Azərbaycanın Vətən müharibəsindəki qələbəsi və bir günlük lokal antiterror tədbirləri vasitəsilə öz dövlət suverenliyini tam bərpa etməsi, artıq Cənubi Qafqaz bölgəsində, həm də Azərbaycanın liderliyi ilə yeni dizayn verilməsi və ümumiyyətlə siyasi xartiyanın yenilənməsi prosesi davam edir.
“Ölkəmiz qalib olmasına baxmayaraq, böyük şanlı qələbə qazanmasından sonra Ermənistana sülh əslində iki ölkə arasında dövlətlərarası sülh müqaviləsinin imzalanması üçün şərtlər irəli sürdü. Artıq bu məsələdən beş ilə yaxın vaxt keçməsinə baxmayaraq, Ermənistan bu və ya digər vasitələrlə sülh müqaviləsi imzalanmasından yayınır və artıq bu proses elə bir həddə gəlib çatıb ki, Ermənistan Azərbaycan tərəfindən qoyulan şərtlərə əməl etməkdən başqa çarəsinin qalmadığının fərqindədir. Nikol Paşinyan yaxşı anlayır ki, Azərbaycanın irəli sürdüyü şərtlər reallığı əks etdirir, həm beynəlxalq hüquqla, həm milli qanunvericiliklə bu şərtlər qeyd şərtsiz qəbul edilməlidir. İki həll olunmamış məsələnin iki bəndin Ermənistan konstitusiyasının dəyişilməsi və “Minsk” qrupunun ikitərəfli olaraq buraxılması şərtləri hələlik həll olunmadan qalır.
Nikol Paşinyanın öz çıxışında “Ermənistan konstitusiyası xalqın iradəsini əks etdirmir” fikri əslinə qalsa, doğrudur, yəni Paşinyan bununla həm öz sələflərinin despot olduğunu və onların hakimiyyəti dövründə Ermənistanın müstəqil olmadığını bildirir, həm də Azərbaycanın irəli sürdüyü şərtlərin qəbul edilməsi üçün zəmin hazırlamağa davam edir.
Burada başqa bir məqam da var. Həm də Paşinyan başqa bir yükdən azad olunmalıdır. Bu da revanşizm qatı millətçilik, digər xalqlara olan nifrət, əsasən də Azərbaycan və Türkiyəyə olan xalqın münasibəti və bütün bu məsələlər Ermənistan cəmiyyətini uzun müddətdir ki, zəhərləyib və bu proses bu gün davam etməkdədir. Keçirilən rəy sorğularında təhlükəli məqam budur ki, əsasında orta və yaşlı nəsil hələ də Azərbaycana və Türkiyəyə nifrətini gizlətmir. Ermənistanda kifayət qədər radikal millətçi təşkilatların partiyaları mövcuddur. Onlar hələ də bu buxovdan xilas olmaq əvəzinə, mənasız revanşist hisslərlə yaşamağa davam edirlər”-deyən Vüqar İskəndərov qeyd edib ki, bu gün Paşinyan hakimiyyəti bu məsələni də həll etməlidir.
Deputat vurğulayıb ki, Ermənistan cəmiyyəti sözün əsl mənasında beynəlxalq aləmdən asılı vəziyyətdədir.
Vüqar İskəndərovun fikrincə, bu cəmiyyət elə Paşinyanın özünün dediyi kimi, indiyə qədər müstəqil olmayıb, digər böyük dövlətlərin əlində alət kimi istifadə olunub və torpaq iddialarında olub, digər dövlətin torpaqlarını işğal edib, terrorçuluq törədib.
Deputat hesab edir ki, bu proses belə davam edə bilməz, çünki dünya sürətlə dəyişir.
“Yeni siyasi mənzərə fonunda Ermənistan hələ də dərin quyuya düşmüş vəziyyətdədir. Bu vəziyyətdən çıxmağın yeganə yolu konstitusiyaya dəyişikliklərin hazırlanması, Konstitusiyada digər dövlətlərin ərazilərinə iddiaların olmaması və bir ölkənin inkişaf etdirilməsi üçün vacib olan qanunların orada əks olunmasıdır ki, bu gün Ermənistanın faktiki konstitusiyası bunları özündə əks etdirmir.
İkinci məsələ də Minsk qrupunun ləğv edilməsidir ki, artıq bu qurum faktiki mövcud deyil. Ehtiyac da yoxdur. Artıq bu konflikt bitib. Müharibə səhifəsi qapanıb. Öz gücünə, öz ali baş komandanının qətiyyətinə, daxili siyasi birliyinə, ordusunun şücaətinə və xalqın birliyinə əsaslanan strategiya ilə bu böyük problem öz həllini tapıb. Bu problemi illər əvvəl həll etməli olan “Minsk” qrupu artıq "təqaüd"ə göndərilib. Artıq real olaraq, onun ləğv olunmasını Ermənistan hakimiyyəti vaxt itirmədən həll etməlidir”-deyən deputatın fikrincə, Paşinyan artıq anlayır ki, indiyə qədər Ermənistanın gəldiyi yol yanlışdır və xəyali Ermənistan qurmaq arzusu uğunda mübarizə aparılması yalnız Ermənistanı uçuruma sürükləyir.
“Yeni çağırışlar, yeni dəyərlər var və bu çağırışlara bugünkü Ermənistan Konstitusiyası, Ermənistan qanunları tam cavab vermir. Xalqın böyük əksəriyyəti hələ də revanşist ideologiyasının məngənəsində boğulmaqdadır. Cəmiyyət bütün bunlardan azad olmalı, hadisələrə real baxmalı və xəyali Ermənistandan real Ermənistana keçid etməlidir”-deyən deputat qeyd edib ki, bütün bu məsələlər bu gün Paşinyan komandasının qarşısında duran məsələlərdir və Paşinyan bunu həll etməlidir ki, Ermənistanı düşdüyü bu ağır böhrandan çıxara bilsin.
