Rusiyada hakimiyyət uğrunda mübarizə hələ də mümkündür və dəyişikliklər qəfil və sərt şəkildə baş verə bilər.

Moderator.az xəbər verir ki, bu barədə "The Sun" nəşrinə müsahibəsində ABŞ müdafiə nazirinin Avropa və NATO siyasəti üzrə keçmiş müavini Yan Bjezinski bildirib.

O, xatırladıb ki, hamı bir yarım il öncə "Vaqner" muzdlu dəstələrinin üsyan edərək Moskvaya doğru irəlilədiyinin şahidi olub. "Amma Putin Rusiyanı çox möhkəm əlində saxlayır", - Bjezinski vurğulayıb.

Bununla yanaşı, o qeyd edib ki, əgər avtoritar rejim nə qədər güclü görünsə də devrilə bilirsə, deməli, o, əslində çox kövrəkdir və tez çökür. "Dönüş nöqtəsi var və o çatanda hadisələr adətən çox sürətli və sərt şəkildə cərəyan edir", - siyasətçi izah edib.

Bjezinski həmçinin ABŞ prezidenti Donald Trampın Ukrayna müharibəsi ilə bağlı mövqeyinə toxunaraq, onun yenidən seçilməsindən sonra dəyişiklikləri qeyd edib.

O bildirib ki, əvvəllər Tramp müharibənin bitməsinin Avropa liderlərinin vəzifəsi olduğunu, ABŞ-ın isə bu məsələdə əsas rol oynamamalı olduğunu düşünüb. O dövrdə Trampın ritorikası Avropa müttəfiqlərini narahat edib, çünki ABŞ-ın geri çəkilməsi Ukraynanı təhlükəli vəziyyətdə qoya bilər.

Lakin Ağ Evə qayıtdıqdan sonra Trampın Moskvaya qarşı daha sərt mövqe tutduğu görünür. "O, Rusiyanı rəqib adlandırır. Bildirib ki, Ukraynanı tək qoymaq niyyətində deyil", - Bjezinski vurğulayıb.

Bundan əlavə, Bjezinskinin sözlərinə görə, Tramp Rusiyanı xəbərdar edərək bildirib ki, əgər bu müharibəni dayandırmasa və danışıqlar masasına oturmasa, o, yüksək gömrük rüsumları tətbiq edəcək.

Siyasətçi həmçinin Trampın Ukrayna ilə bağlı mövqeyinin dəyişkənliyindən narahat olduğunu bildirib. "Hələ də bir qədər narahatam, amma müəyyən ümidlərlə bu prosesi izləyirəm", - o, əlavə edib.