Paşinyan da konstitusiya dəyişikliyinə can atır
21-04-2025, 19:00
Ermənistanın əvvəlki konstitusiya referendumları xalqın iradəsini əks etdirmir.
Bunu Ermənistan Baş naziri Nikol Paşinyan deyib.
Baş nazirin sözlərinə görə, Ermənistanda asayiş və cəmiyyət arasında uçurum var.
Ədliyyə sektorunda problemlər məhz buna görə yaranır. Və bu boşluq, digər məsələlərlə yanaşı, bütün konstitusiya referendumlarında ictimaiyyətin rəsmi nəticələrin xalqın iradəsini ifadə etmədiyi və ya tam ifadə etmədiyinə əmin olması ilə bağlıdır.
Siyasi şərhçi Tural İrfan “Sherg.az”a bildirib ki, Ermənistan konstitusiyasında qonşu dövlətlərin ərazi bütövlüyünə qarşı iddialar və hətta onların özləri üçün zərərli müddəalar var:
“Baş nazir Nikol Paşinyan Azərbaycanın tələbləri qarşısında və yaranmış reallıq müqabilində konstitusiya dəyişikliyinə getməlidir. Əgər sülh olacaqsa bu kövrək və səthi yox, köklü və qarantlı olmalıdır. Baş nazir bəyan etdi ki, Qarabağ Azərbaycanın ərazisidir və bu reallığı rəsmi İrəvan qəbul etdir. Məntiqlə, əgər baş nazir xalqın etimadına söykənərək hakimiyyətdədirsə, o zaman niyə mövcud konstitusiyada buna zidd iddialar var?. Demək konstitusiya xalqın iradəsini əks etdirmir. Ermənistan hakimiyyəti hazırda bunun üzərində çalışmalı, konstitusiyadakı əsasız müddəalara görə Türkiyə və Azərbaycan kimi qonşularla əvvəlki münasibətə qayıtmamalıdır. Sülhün və sabitliyin bərqərar olması üçün silahlanmanı dayandırmalı, konstitusiyanı dəyişməli və ATƏT-in Minsk qrupunun ləğvi ilə bağlı real addım atmalıdır. Ümid edirəm ki, ATƏT-in baş katibi ilə keçirilən görüşdə bu mövzu əsas məsələ kimi qoyulub. Hiss olunan odur ki, Nikol Paşinyan da konstitusiyada dəyişikliklər edilməsinə getməyə can atır. Lakin o, ölkə daxilindəki müxalifətin və Rusiya yönlü qrupların manelərini dəf etməyə çalışır. Çünki Paşinyan bilir ki, Ermənistanın yaşaması və inkişaf etməsi yalnız Azərbaycan və Türkiyə ilə normal münasibətlərdən keçir. Əks halda məğlub olmuş Ermənistan güclənən Azərbaycan və nəhəng Türkiyə qarşında xarici himayədarlarının dəstəyini alsa da belə heç bir üstünlük əldə edə bilməz. Ona görə də konstitusiya dəyişikliyinə gedərək sülhə tam və real olaraq hazır olmalıdır”.
Geri qayıt