Ədalət partiyasının sədr müavini “qiyam” ittihamlarına cavab verdi:
17-04-2025, 08:38
Mərhum hüquq elmləri doktoru İlyas İsmayılovun vəfatından sonra lider boşluğu böhranı yaşayan Ədalət Partiyasında sular durulmur. Bir neçə gün əvvəl partiyanın Siyasi Şurasının bir qrup üzvünün iştirakı ilə keçirilən iclasında qurultayın keçirilməsi barədə qərar qəbul olunmuş, qurumun Ali Məclisinin sədri Meydan Babayev isə bu etiraz edərək bəyanat yaymışdı. Ovqat.com-un 15-04-2025 tarixli buraxılışında dərc olunan bəyanata partiyanın sədr müavini Mütəllim Rəhimlinin cavabı özünü çox gözlətmədi.
Ovqat.com Mütəllim bəyin yazılı açıqlamasını olduğu kimi təqdim edir.
“Ədalət Partiyası qurultayını keçirəcək, bunu istəməyənlər olsa da”
Son günlər Ədalət Partiyası ətrafında bəzən həqiqətə uyğun olmayan informasiyalar yayılmaqdadır. Partiya daxilində pozuculuq fəaliyyəti ilə məşğul olan Meydan Babayev ovqat.com-a verdiyi açıqlamada yalan danışaraq, partiya üzvlərini və cəmiyyəti aldatmağa cəhd edib.
Partiya daxilində baş verən prosesləri cəmiyyətimizin də bilməsi lazımdır. Buna görə də bildirirəm ki, aprelin 12-də partiyanın ofisində Siyasi Şuranın iclasında tamamilə Nizamnaməyə uyğun qərar qəbul edilmişdir. Əvvəla, Meydan Babayev deyir ki, onun Siyasi Şuranın iclasından xəbəri olmayıb. Yalandı! Votsap qrupunda onun yazısı var, qrupda olan hər kəsə müraciət edir ki, aprelin 12-də Siyasi Şuranın iclasının keçirilməsinin əleyhinə deyil və onun da təkliflərinin müzakirə olunması fikrini irəli sürür. (Onun votsapdakı yazısını sizə təqdim edirəm və xahiş edirəm ki, yayımlayın.) Belə olduğu halda bu adam necə deyə bilər ki, iclasın keçirilməsindən xəbəri olmayıb. Bəlkə Siyasi Şura üzvlərinin orada nə danışaqcaqlarını da Meydan Babayev müəyyənləşdirmək istəyir?!
İkincisi, o iddia edir ki, guya Siyasi Şuranın iclasında aidiyyatı olmayan şəxlər iştirak ediblər. Bu da ağ yalandır. İclasın qərarı var və orada iştirak edən hər bir Siyasi Şura üzvü imza edib və adını yazıb. Bunu da sizə təqdim edirəm, qoy oxucular özləri həqiqəti görsünlər.
Üçüncüsü, iclasda kvorum olub və bununla bağlı deyilənlərin heç bir əsası yoxdur. Belə ki, hazırda Siyasi Şuranın 11 nəfər üzvü var və onlardan 7 nəfəri iştirak edib. Partiyanın Nizamnaməsinin 5.9.3-cü maddəsinə görə “Siyasi Şuranın iclasları ayda iki dəfədən az olmayaraq keçirilir. Üzvlərin yarıdan çoxu iştirak etdikdə iclas səlahiyyətlidir. Qərarlar sadə səs çoxluğu ilə qəbul edilir”. Göründüyü kimi yetərsay var və qərarın lehinə minimum 4 nəfər səs versə keçərli olur, halbuki 7 nəfər səs verib. İndi Meydan Babayevin təsiri və təkidi ilə kimsə imzasından imtina edirsə, bu da onun öz işidir və həmin şəxsin nə qədər dayanıqlı siyasi obraza malik olduğunu göstərir. Sizi inandırıram, Meydan Babayev bu faktdan gələcəkdə həmin şəxsin əleyhinə istifadə edəcək. Çünki o yaxşı intriqa ustası və şər-böhtan makinasıdır.
Onu da deyim ki, bir nəfər doğurdan da iclasa on-line qoşulub. Nizamnamədə buna hər hansı qadağa yoxdur. İclas tamamilə elektron qaydada qeydə alınıb və protokollaşdırılıb.
Nizamnamənin 5.9.1-ci maddəsinə görə “Siyasi Şura Ali Məclisin yığıncaqları arasındakı dövrdə partiyanın operativ fəaliyyətini həyata keçirən direktiv orqandır”. Görünür, Meydan bəy direktiv sözünün mənasını başa düşməyib. Direktiv - bir işi yerinə yetirmək üçün ali orqan tərəfindən aşağı orqanlara verilən göstəriş, əmr, təlimat və s. hesab olunur. Ədalət Partiyasının Siyasi Şurası isə Ali Məclisin iclasının çağırılması haqqında qərar qəbul edib və hazırda bu qərar icra olunmaqdadır.
Onu da deyim ki, Siyasi Şuranın iclasını Ali Məclis sədrinin 1-ci müavini, Auditorlar Palatasının üzvü, hörmətli Elçin Qurbanov açıb. Bundan sonra müzakirələr başlayıb.
Partiyanın Nizamnaməsinə görə, Qurultay mart ayının 14-dək keçirilməli idi. Milli ənənələrimizə hörməti və sadiqliyi nəzərə alaraq İlyas müəllimin qırx mərasimi çıxmamış Qurultay haqqında danışmaq doğru olmazdı. Martin 31-də ilyas müəllimin “qırxı” çıxdı. Lakin Meydan Babayev qurultay üçün lazım olan prosedurlara başlamaq istəmirdi. Hər dəfə iclası təxirə salırdı. Son iclasda da hesab edirdi ki, kvorum olmayacaq. Ona görə iclasa gəlməmişdi, başqa bir düşüncə yoldaşını da gəlməyə qoymamışdı. Lakin onun gözləmədiyi baş verdi. Siyasi Şura üzvləri iclasa gəldilər, yetərsay alındı və qərar qəbul olundu. Bu qərar rayon təşkilatlarının iradəsi əsasında qəbul olunub.
Biz nə etməliydik? Çoxminli partiya üzvləri bu adamın nazı ilə oynamalıdır! Meydan Babayev özündə məsuliyyət hiss etmir, ancaq bu partiyanın yükünü çiyinlərində daşıyan çoxsaylı insanlar var ki, daxildə gedən pozuculuq hərəkətlərinə dözə bilmirlər. Axı Meydan Babayev düşünə bilmir ki, bizim Ədliyyə Nazirliyinin reyestrində qeydiyyatımızın vaxtı bitib və tezliklə bunu aradan qaldırmasaq, partiyanın hüquqi mövcudluğu sual altına düşəcək. O bunu düşünə bilməz və hətta deyərdim ki, vecinə də deyil. Çünki partiyanın yaranmasında heç bir əziyyəti olmayıb. Ancaq çoxsaylı üzvlərimiz var ki, dəfələrlə piket keçirərək partiyanın dövlət qeydiyyatına alınmasına nail olublar. Partiyanın bütün tədbirlərində fəal iştirak ediblər. Onlar həyatlarını Ədalət Partiyasına bağlayıblar. Meydan Babayev isə bir partiyanı digərinə dəyişməklə ideoloji, siyasi bağlılığı olmadığını göstərir.
Bu adamın bütün yalanlarına və iftiralarına baxmayaraq Ali Məclisin iclası keçiriləcək və heç kim bunun qarşısını ala bilməz.
Hazırda Ədalət Partiyasının 56 rayon təşkilatı fəaliyyət göstərir. Ədliyyə Nazirliyində üzvlərin reyestrində də məhz bu təşkilatların üzvlərinin siyahısı yer alıb. Rayon təşkilatları gündə bir absurd fikir irəli sürən Meydan Babayevə deyirlər ki, qurultay çağırılsın və bütün problemlər orada müzakirəyə çıxarılsın. Amma nədənsə bu adam Qurultaydan qorxur. İndi də başlayıb paralel rayon təşkilatları yaratmağa. Bəzi səmimi insanları aldadıb adını partiyaya yazdırır və yaxud xahiş- minnətlə onları dilə tutur ki, müvəqqəti də olsa “üzv” olsunlar, sonra onların xəcalətindən çıxacaq. Bu təfəkkürlə siyasi partiya qurula bilərmi! Siz indi baxın, dağıdıcı kimdir.
Ən acınacaqlısı isə odur ki, mənasız və dağıdıcı fikirlərinə ideya adı verir. Beləsinə deyiblər, utanmasan oynamağa nə var. Adam 3 cümlə yazıb orada səhv buraxmasa, bu möcüzə olar. Gələcəkdə lazım olsa onun mənasız fikirlərini də bölüşəcəm, özünüz baxıb nəticə çıxarasınız. Görün, bunun içində nələr yatır.
Mənim partiya sıralarından xaric olmağım haqqında da danışır. Partiya sıralarından üzvün xaric edilməsi özəyin və Mərkəzi Nəzarət Təftiş Komissiyasının səlahiyyətinə aiddir. Mən hazırda Mərkəzi özəkdə qeydiyyatdayam və bu özəyin üzvləri Siyasi Şura üzvlərindən təşkil olunub. Buyursun, həm özəyə, həm də MNTK-ya müraciət etsin. O məni özünün yaratdığı votsap qrupundan zəiflik edərək çıxarıb, çünki fərqli fikrə dözümlülüyü yoxdur. Lakin Ədalət Partiyasının Rayon Təşkilatlarının sədrlərinin votsap qrupu var və biz fəaliyyətimizi orada koordinasiya edirik.
Ədalət Partiyası monolit bir qurumdur. Onu parçalamaq cəhdləri puça çıxacaq.
Biz İlyas İsmayılovun siyasi irsini davam etdirməli, onun Azərbaycanın siyasi müstəvisinə gətirdiyi mədəniyyəti yaşatmalıyıq. Elə bu prinsiplərdən çıxış edərək, kimsəyə qarşı hər hansı ittiham səsləndirməkdən imtina edirəm, həqiqətləri çatdırmaqla kifayətlənirəm”.
Geri qayıt